იმისათვის რომ არ განმეორდეს14 ივნისის ტრაგედია, საქართველოს მთავრობა ვალდებულია არა მხოლოდ სტიქიით გამოწვეული მაგისტრალის დაზიანებული უბნები შეაკეთოს, არამედ მოახდინოს მისი რეკონსტრუქცია უსაფრთხოების ყველა ზომის დაცვით. ამისათვის აუცილებელია შემუშავდეს ახალი პროექტი ყველა (შესაბამისი) დარგის გამოცდილ სპეციალისტებთან კონსულტაციების საფუძველზე. ცხადია, პროექტის შემუშავებას და მის შემდგომ განხორციელებას საკამო დრო დასჭირდება, რაც გარკვეულ დისკომფორტთან იქნება დაკავშირებული მათთვის, ვინც ამ მაგისტრალით ყოველდღიურად ვსარგებლობდით. მაგრამ, ამ შემთხვევაში, სჯობს თავი შევიწუხოთ, რათა თავიდან ავიცილოთ სრულიად რეალური კატასტროფა მომავალში.

აღნიშნული პროექტის განხორციელებისთვის საქართველოს ინტელექტუალური პოტენციალი რომ გააჩნია, ყველასთვის ცნობილია. იმედი მაქვს, მთავრობა მოახერხებს სახსრების მობილიზებას პროექტის გასახორციელებლად, რადგან ადამიანის სიცოცხლე გაცილებით ღირებულია, ვიდრე რომელიმე მაგისტრალი. ასევე, ძალიან მნიშვნელოვანია ცხოველების უსაფრთხოება, მითუმეტეს იმ შემთხვევაში, თუ ზოოპარკის ადგილმდებარეობის შეცვლა არ იგეგმება.

და ბოლოს, აუცილებელია საქართველოს მოსახლეობის ცნობიერების ამაღლება ბუნების დაცვის საკითხებში. მასობრივი საპროტესტო აქციები მარტო ვადამდელი არჩევნების მოთხოვნით არ უნდა იმართებოდეს. თუ საჭირო გახდება, ყოველი ხის მოჭრის წინააღმდეგ უნდა გამოვთქვათ თამამი პროტესტი. ბუნება შეცდომებს არ გვპატიობს!