Enginn hefur verið ötulli við að segja íslensku stjórnarelítunni til syndanna og hvetja þjóðina til að horfast í augu við sjálfa sig af einurð og heiðarleika en Lára Hanna Einarsdóttir. Þar tekur hún hugsanlega jafnvel fram mönnum eins og Agli Helgasyni og fleiri ísbrjótum í eftirhraglanda bankahrunsins. Og eins og hún segir sjálf, þá gagnrýnir hún ALLA og er ekki bundin á klafa neins stjórnmálaflokks eða hagsmunaaðila. Það er því eins og köld gasgusa framan í íslenskan almenning að þessum einstaklingi sé úthýst úr Ríkisútvarpi landsmanna fyrir þær "sakir" einar að hún leyfir sér að birta álit sitt og gagnrýni á fleiri stöðum en í Ríkisútvarpinu einu. Þessi ákvörðun valdamanna Ríkisútvarpsins hlýtur að vekja þá spurningu með fólki hvort ÞEIR sjálfir séu ekki þjóðinni skeinuhættir vegna mögulegra óhreinna hagsmunatengsla; enda er það tilfinning alls almennings á Íslandi að valdakerfi og valdahagsmunir innan Ríkisútvarpisns séu jafn ógegnsæ og óheiðarleg og íslenskra bankastofnana. Það fer að verða spurning hvort þess verður ekki brátt krafist á Alþingi að valdakerfi Ríkisútvarpsins verði rannsakað af óháðri rannsóknarnefnd á borð við þá sem lagði fram Sannleiksskýrsluna svonefndu ... Eitt er víst: Lára Hanna Einarsdóttir er sannverðugur fulltrúi hlutlausra, sannleiksleitandi Íslendinga varðandi þá kröfu að allar hliðar bankahrunsins verði rannsakaðar til hlítar. VIÐ KREFJUMST ÞESS AÐ HÚN VERÐI ENDURRÁÐIN TIL RÍKISÚTVARPSINS NÚ ÞEGAR.