ለ፡ የፌዴራል የሥራና ክህሎት ሚኒስቴር
አዲስ አበባ

ጉዳዩ፡ በአዲስ የውጭ ሥራ ስምሪት ኤጀንሲዎች የፈቃድ አሰጣጥ ሂደት ላይ ቅሬታና የመፍትሔ ጥያቄ ስለማቅረብ

ክቡራን የሚኒስቴር መሥሪያ ቤቱ ኃላፊዎች፣

እንደሚታወቀው፣ የሥራና ክህሎት ሚኒስቴር ባወጣው ማስታወቂያ መሠረት አዲስ የውጭ ሥራ ስምሪት ኤጀንሲ ለማቋቋምና ሥራ ለመጀመር የሚያስፈልጉትን መስፈርቶች ከስምንት ወራት በፊት አሟልተን ማቅረባችን ይታወቃል። ሆኖም እስካሁን ድረስ ከሚኒስቴር መሥሪያ ቤቱ የመጨረሻ ፈቃድ ማግኘት ባለመቻላችን ወደ ሥራ መግባት አልቻልንም።

ከዚህም በተጨማሪ፣ ጥቂት ኤጀንሲዎች ከሚኒስቴር መሥሪያ ቤቱ ፈቃድ በማግኘት ሥራ መጀመራቸው እየታወቀ፣ እኛ ግን ሁሉንም አስፈላጊ መስፈርቶች አሟልተን ለረጅም ጊዜ ብንጠብቅም የመሥሪያ ቤቱን የመጨረሻ ውሳኔና ፈቃድ ማግኘት አልቻልንም።

ይህ ሁኔታ ኤጀንሲዎቻችንን በከፍተኛ የገንዘብና የኢኮኖሚ ጫና ውስጥ ከመክተቱም በላይ፣ የተከራየና የተዘጋጀ ቢሮ፣ የሰው ኃይልና ሌሎች የሥራ ማስኬጃ ወጪዎች ለረጅም ጊዜ ያለ ምንም ገቢ እንዲባክኑ አድርጓል። በተጨማሪም ፈቃዳችን በሲስተሙ ላይ ተንጠልጥሎ መቆየቱ የንግድ ሥራችንን ለመጀመር እንቅፋት ሆኖብናል።

በመሆኑም ከአዲሱ የሚኒስቴር መሥሪያ ቤቱ አመራር የምንጠብቀው፦

1. አስፈላጊውን መስፈርት አሟልተው ለረጅም ጊዜ የፈቃድ ማግኘት ሂደታቸው ተገትቶ የሚገኙ ኤጀንሲዎች ጉዳይ በአስቸኳይ እንዲታይ።
2. ለአንዳንድ ኤጀንሲዎች ፈቃድ ተሰጥቶ ሌሎች ተመሳሳይ መስፈርት ያሟሉ ኤጀንሲዎች የተገደቡበትን አሠራር በግልጽነትና በፍትሐዊነት እንዲገመገም።
3. የፈቃድ አሰጣጥ ሂደቱ በግልጽ፣ በተመሳሳይ መስፈርትና ያለ አድሎ እንዲፈጸም።
4. ለረጅም ጊዜ በሲስተሙ ላይ ተንጠልጥለው የሚገኙ የፈቃድ ጉዳዮች በአስቸኳይ ተፈትሸው ኤጀንሲዎቹ ሥራቸውን እንዲጀምሩ አስፈላጊው ውሳኔ እንዲሰጥ።

በመጨረሻም፣ እኛ ኤጀንሲዎች የመንግሥትን ሕግና ደንብ በማክበር፣ የተጠየቁትን መስፈርቶች አሟልተን ሥራ ለመጀመር ከፍተኛ ወጪና ጥረት አድርገናል። ስለሆነም የአዲሱ አመራር የፍትሐዊነት፣ የግልጽነትና የተቋማዊ ተጠያቂነት መርሆዎችን በመከተል ይህንን ችግር በአፋጣኝ እንዲፈታልንና ሥራችንን እንድንጀምር አስፈላጊውን እርምጃ እንዲወስድልን በአክብሮት እንጠይቃለን።

ከሰላምታ ጋር፣