Ágætu íbúar Árborgar,

Nú er í auglýsingu deiliskipulagsbreyting sem snýr að miðbæjarsvæði Selfoss, eða Sigtúnsgarði og nærliggjandi svæðum. Skv. því skipulagi mun verulegur hluti Sigtúnsgarðsins fara í hendur þeirra aðila sem hyggja á framkvæmdir þar, Sigtúns þróunarfélags ehf. Ef deiliskipulagið verður samþykkt eins og það er auglýst munu íbúar Árborgar tapa stórum hluta af Sigtúnsgarði undir þá byggð sem áformuð er, þó öðru sé haldið fram.

Uppi hafa verið hugmyndir á meðal íbúa sveitarfélagsins að í Sigtúnsgarði verði þegar fram líða stundir fallegur garður uppbyggður með afþreyingu fyrir almenning og almennt fallegt og gróið umhverfi. Þessi markmið geta vel farið saman með einhverri uppbyggingu á miðbæjarsvæðinu en sú breyting sem nú er auglýst tekur yfir um helming þess svæðis sem við höfum hingað til talið til Sigtúnsgarðs.

Ljóst er að ef skipulagsbreytingin nær fram að ganga verður ekki hægt að halda þær hátíðir sem árlega eru haldnar með sama hætti og verið hefur vegna plássleysis í garðinum í ört stækkandi sveitarfélagi. Þetta teljum við undirrituð óásættanlegt og höfum því hafið undirskriftarsöfnun gegn deiliskipulagsbreytingunni.

Kæru íbúar, tíminn er naumur þar sem að skila þarf inn athugasemdum við skipulagsbreytingunum fyrir 29. ágúst.

Tökum höndum saman, verndum Sigtúnsgarðinn og skrifum undir þessa áskorun gegn deiliskipulagsbreytingunni. Undirskriftum verður skilað til framkvæmdastjóra Árborgar þegar henni lýkur þann 28.ágúst.

Hólmfríður Einarsdóttir, Davíð Kristjánsson, Axel Sigurðsson, Magnús Ragnar Magnússon, Klara Öfjörð, Steindór Guðmundsson, Björk Reynisdóttir, Sigurður Magnússon, Gísli Ragnar Kristjánsson og stuðningsmenn.

Frekari upplýsingar má sjá á https://www.facebook.com/sigtunsgardur