༄༅། །མཁྱེན་ཡངས་(གནས་སྐབས་སྒོ་རྒྱབ་པའི་)ནིའུ་ཡོག་དང་ནིའུ་ཇེར་སི་གཉིས་ཀྱི་ས་གནས་གཞོན་ནུའི་རྒྱུན་ལས་རྣམས་ཀྱི་སྙན་ལམ་དུ།

ཉེ་སྔོན་ཟླ་ ༡ ཚེས་༩ ཉིན་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་དང་དྲུང་ཆེ་གཉིས་ནས་ནིའུ་ཡོག་དང་ནིའུ་ཇེར་སི་གཉིས་ཀྱི་མི་མང་ལ་ནིའུ་ཡོག་དང་ནིའུ་ཇེར་སི་གཉིས་ཀྱི་ས་གཞོན་དང་དབུས་གཞོན་ནུའི་དབར་གྱི་རྙོག་གླེང་དང། ལྷག་པར་ཕྱི་ལོ་ ༢༠༡༥ ཟླ་ ༡༢ ཚེས་ ༡༦ ཉིན་དབུས་གཞོན་ནུ་ནས་གནས་སྐབས་རིང་ནིའུ་ཡོག་དང་ནིའུ་ཇེར་སི་གཉིས་ཀྱི་ས་གཞོན་སྒོ་རྒྱབ་དགོས་པའི་གནད་དོན་མང་དག་ཅིག་གི་ཐོག་ལ་གསལ་བཤད་དང་དྲི་བ་དྲིས་ལན་གྱི་ཚོགས་འདུ་ཞིག་ཚུགས་ཡོད་པ་ཁྱེད་རྣམས་ཀྱིས་ཤེས་གསལ་རེད། ལྷག་དོན་དུ་སྐབས་དེར་མི་མང་ ༨༠༠ ལྷག་འདུ་འཛོམས་བྱས་པ་རྣམས་ནི་དབུས་གཞོན་ནུའི་ཚོགས་གཙོ་དང་དྲུང་ཆེ་གཉིས་ཀྱི་སྤུན་མཆེད་དང་དགའ་ཉེ་ཤ་སྟག་མིན་པ་ཡང་ཁྱེད་ཀྱིས་ཤེས་གསལ་རེད། ཚོགས་འདུ་དེའི་སྟེངས་དབུས་གཞོན་ལྷན་གྱི་ཚོགས་གཙོ་དང་དྲུང་ཆེ་གཉིས་ནས་རྒྱུ་མཚན་ཁུངས་ལུང་ལྡན་ཅིང་དཔང་རྟགས་དང་བཅས་པའི་ཐོག་ནས་གསལ་བཤད་ཞིབ་ཅིང་ཕྲ་བ་གནང་བ་ལ་མི་མང་རྣམས་དགའ་བ་དཔག་མེད་བྱུང་རྗེས་། མཐའ་མ་དེར་དབུས་གཞོན་ལྷན་གྱི་རྒྱུན་ལས་རྣམས་ཀྱིས་(གནས་སྐབས་རིང་ནིའུ་ཡོག་དང་ནིའུ་ཇེར་སེ་གཉིས་ཀྱི་)ཐག་གཅོད་ཇི་ལྟར་བྱུང་བ་ལ་རྒྱབ་སྐྱོར་ཤུགས་ཆེན་བྱུང་ཡོད། དེར་བརྟེན་ཁྱེད་རྣམས་ཁ་རི་ཁ་ཐུག་(ལྷག་བསམ་ཁ་རི་ཁ་ཐུག་ལས་ཚིག་གཡར་ཞུས་) གིའབོད་སྐུལ་གཅིག་རང་ཡོད།

༼ཕྱི་ལོ་ ༢༠༡༦ ཟླ་བ་ ༡ ཚེས་ ༢༠ གོང་དུ་ཆ་རྐྱེན་གང་ཡང་མེད་པར་བོད་མིའི་ཡ་རབས་བཟང་སྤྱོད་ཀྱི་རྣམ་པའི་ཐོག་ནས་བར་བརྒལ་གྱི་རྒྱུན་ལས་བཞི་ལ་། ནིའུ་ཡོག་དང་ནིའུ་ཇེར་སི་གཉིས་ཀྱི་ས་གནས་གཞོན་ནུ་ལ་དབང་བའི་ཁབ་སྐུད་ཙམ་ཡང་ཆད་ལྷག་མེད་པར་རྩིས་སྤྲོད་གནང་སྐྱོང་ཡོང་བར་ཞུ།༽