Am Moment ass vum Educatiounsministère geplangt, d'Ofschlossexamen 2014 un engem Stéck schreiwen ze loossen. Bis elo war et nach ëmmer esou, dass tëscht den Epreuven eng Woch Paus ass, verursaacht duerch d'Päischtvakanz (ausser 2005) [1]. Dës Petitioun ass dofir geduecht de Ministère a virun allem d'Madame Delvaux-Stehres dozou opzeruffen hir aktuell Pläng sou séier wéi méiglech ze iwwerdenken an ze änneren. 

Mir sinn net domadder averstanen, dass d'Ofschlossexamen 2014 ouni Paus, un engem Stéck geschriwwe solle ginn. 

Mir wënschen eis, dass de Ministère eng Léisung fënnt fir de Schülerinnen a Schüler, déi 2014 hiren Exame schreiwen, déi Woch Paus, wéi jidderengem virun hinnen, anzegestoen. 

Déi Woch Paus tëscht de schrëftlechen Exame gëtt säit Jore vun de Schülerinnen a Schüler dofir benotzt nach eng Kéier de ganze Cours ze widderhuelen. Wisou soll dëse Joergank elo dës fräi Zäit net zur Verfügung gestallt kréien? Ouni dës examefräi Woch wiere vill Ofschlossnotte méi schlecht ausgefall. Mir fuerderen näischt aneres ewéi, dass dëse Joergank d'selwecht ewéi all déi virdru behandelt gëtt!  

Dës Petitioun gouf vum Claude Feltgen gestart.

[1] http://www.wort.lu/fr/view/pas-de-conge-de-la-pentecote-entre-les-epreuves-du-bac-en-2014-au-luxembourg-5195287ae4b0bed7450a9d22