Den un kampaña di mentira a malusá e nesesidat di pueblo pa entregá nos outonomia. Esei ta loke a sosodé ku e referèndem di 2009.

A mal informa pueblo ku ta trata di koperashon boluntario, pa despues hinka den e leinan aki, ku Kòrsou no por sali fo’i nan sin aprobashon di tantu Sint Maarten komo Ulanda. Asina a malusá artíkulo 38 di statüt pa duna Ulanda influensia determinante riba asuntu ku konstitushonalmente ta pertenesé na nos outonomia.

Lokual nos tin ta un pais sin kòntròl riba su finansa. Un Banko Sentral kompart. Un Prokurador General kompartí ku ningun hende den e pais aki a skohe. E ta mas poderoso ku nos Minister di Hustisia, nos Promé Minister i nos parlamento. E Leinan di konsenso ta duna e órganonan aki poder ku no por wòrdu kontrolá dor di pueblo por medio di elekshonnan liber i demokrátiko.

E base di e leinan aki no ta pa sirbi nos i nan lo sigui trese problema i divishon. Awor ta ora pa nos mes asumí nos responsabilidat i eksigí pa Kòrsou ta outónomo real. No ta akseptabel pa biba den un pais sin base demokrátiko.

A sobra solamente un arma, i esei ta un ola i movementu masal di protesta. E movementu aki ta di pueblo i no ta liga na ningun partido polítiko. Outonomia ta e derecho di tur pueblo i no algu di polítika partidista.

Yena e petishon aki si bo ta kere den un Kòrsou fuerte i outónomo.