Il-kompożituri, l-awturi, il-kantanti u s-segwaċi tal-Festival l-Għanja tal-Poplu, li għandhom għal qalbhom tant dan il-festival jinsabu preokkupati b'dawn iż-żewġ regolamenti li daħlu fis-seħħ fil-festival ta' din is-sena.

Regola 5.2

• Ir-regola 5.2 tgħid li “l-isem tal-kompożitur u awtur ma jistax jidher iktar minn ma’ żewġ kanzunetti fis-serata finali. Fil-kas li jgħaddu ktar minn tnejn, jintagħżlu l-aħjar tnejn.” B’dan ir-regolament nemmnu li l-kumitat qed jagħmilha ċara li l-kanzunetti finalisti, mhux neċċeserjament ħa jkunu l-aqwa kanzunetti li ġew mitfugħa għal festival ta’ din is-sena. Il-kompożituri, l-awturi u l-kantanti jaħdmu b’timijiet differenti, allura dan iffisser li kompożitur, awtur jew kantant jista’ jiġi ippenalizzat u ma jgħaddix għas-serata finali għax ħadem ma’ persuna partikolari, meta l-prodott li preżenta seta’ kien fost l-aqwa minn dawk sottometti.
• Il-kumitat għandu jagħżel l-aħjar kanzunetti li ġew sottometti fil-festival, irrispettivament min kiteb dawn il-kanzunetti. B’hekk wieħed jassigura li dan ikun festival ta’ kwalita’ bl-aqwa materjal possibli.

Regola 5.3

• Ir-regola 5.3 tgħid “kull kantant/a jista’ jkanta kanzunetta waħda biss fis-serata finali. Fil-każ li kantant ikollu sehem f’iktar minn kanzunetta waħda, jiġi mitlub jagħżel kanzunetta minnhom, filwaqt li l-awtur u l-kompożitur tal-kanzunetta l-oħra jiġu mitluba jsibu kantant ieħor”,dan ifisser li jekk jgħaddi bi tnejn jew aktar, il-kantant irid jagħżel hu liema kanzunetta ħa jinterpreta filwaqt li l-oħrajn irridu jinżammu bilfors fil-kompetizzjoni u jgħaddu għand kantanti oħra.
• B’dan ir-regolament, kantant li ħa jixħet aktar minn kanzunetta waħda, jaf ħa jispiċċa f’pożizzjoni skomda fejn ikollu jagħżel bejn żewġ kanzunetti u żewġ timijiet li emmnu fil-ħila tiegħu. Barraminnhekk bosta drabi, ħafna mill-ispejjeż tal-kanzunetti jieħdu ħsiebhom il-kantanti, jekk kanzunetta li ħallas il-kantant trid tinżamm fil-kompetizzjoni bilfors min ħa jkun responsabbli għall-ispejjeż li jkunu saru?
• Nemmnu li l-kumitat għandu jżomm fil-kompetizzjoni l-kanzunetta li ġabet l-aktar punti u l-kantant ikanta dik. Il-kanzunetti l-oħra jistgħu jinżammu jew jitwaqqgħu mill-kompetizzjoni fuq qbil mat-tim rispettiv (kantant/kompożitur / awtur).

Minn hawn qed nitolbu lil Kumitat sabiex jiġu ikkunsidrati dawn it-talbiet tagħna u nħeġġu lil kull min għandu għal qalbu dan il-festival li jiffirma.

Grazzi mill-qalb.