Sra Conselleira de Sanidade da Xunta de Galicia
Santiago de Compostela

Sra Conselleira

A Atención Primaria pode resolver, de feito resolve, a maioría dos problemas de saúde. Unha Atención Primaria forte e resolutiva é unha aposta pola eficiencia en tempos de crise, é unha aposta pola máxima capacidade de resolver problemas tendo en conta a opinión do paciente, dun modo integrado na comunidade, coa menor intervención posible e co menor custe.
A Atención Primaria debe ser a prioridade sempre, pero moito máis en tempos de crise e de recortes orzamentarios.
Resulta sorprendente que a súa Consellaría, ao mesmo tempo que promove recortes e menciona repetidamente as dificultades económicas que ten para aumentar recursos, para pagar as retribucións acordadas ou reiniciar a negociación e aplicación da carreira profesional, agora se dedique a promover a Atención Primaria como áreas de negocio de construtoras ou outras empresas pola vía da Iniciativa de Financiamento Privado.
Rexeitamos o anuncio do 7 de abril de 2011 do Diario da Unión Europea de licitación de 18 centros de saúde galegos por un importe de 233 millóns de euros (incluíndo o IVE). Este despilfarro orzamentario vai hipotecar o financiamento sanitario e dificulta moito a viabilidade económica da atención primaria.
Pedímoslle que anule este concurso e aposte polo diálogo con todas as organizacións profesionais, científicas e sindicais de atención primaria para facer, entre todos, unha Atención Primaria máis potente, máis atractiva e máis resolutiva.

Galicia, 12 de abril de 2011

Se desexas apoiar esta iniciativa, asina a petición online co teu nome e apelidos e un enderezo de correo electrónico válido. Despois de asinar pode aparecer unha páxina que solicita doazóns para o mantemento do sistema de ipetitions; podes ignoralo por completo: unha vez que introduces o teu nome e correo-e a túa sinatura xa queda rexistrada.

Sponsor

Links