نه‌خۆشخانه‌ 400 قه‌ڕوێڵه‌یه‌کی سلێمانی ئه‌وه‌ بۆ ماوه‌ی 13 ساڵه‌ بڕیاری جێبه‌جێکردنی ده‌رچووه‌ و به‌شێکی زۆری کاری بیناسازی تێیدا ته‌واوبووه‌ به‌ڵام به‌داخه‌وه‌ ئێستا کاره‌کان له‌و نه‌خۆشخانه‌ وه‌ستاوه‌ و به‌ نیوه‌ناچڵی هێڵڕاوه‌ته‌وه‌.

ته‌واونه‌کردنی ئه‌م پرۆژه‌‌ ته‌ندروستیه‌ گرنگه‌ له‌ کاتێکدایه‌ که‌ په‌یداویستیه‌ ته‌ندروستیه‌کانی خه‌ڵکی سلێمانی به‌ تایبه‌تی و ناوچه‌که‌ به‌ گشتی ڕۆژ له‌ دوای رۆژ له‌ هه‌ڵکشاندایه و له‌ هه‌مانکاتدا قه‌ڕه‌باڵه‌غیه‌ک و فشارێکی زۆر له‌ سه‌ر نه‌خۆشخانه‌ و بنکه‌ ته‌ندروستیه‌کانی تر به‌دی ده‌کرێت. ته‌واو نه‌کردن و دواخستنی به‌کارخستنی نه‌خۆشخانه‌که‌، زیانێکی گه‌وره‌ی نه‌ک ته‌نها به‌ ته‌ندروستی خه‌ڵک گه‌یاندووه‌ به‌ڵکو به‌هۆی ته‌رخانکردنی بودجه‌ی زیاتره‌وه‌ زیان به‌ ئابوری هه‌رێمیش ده‌گه‌یه‌نێت.

ئێمه‌ ئه‌و ڕێکخراو و کۆمه‌ڵه‌ و که‌سایه‌تی و پزیشکانه‌ی له‌ خواره‌وه‌ ئیمزامان کردووه‌ داوای هه‌رچی زووتری ته‌واوکردن و ده‌ستبه‌کاربوونی نه‌خۆشخانه‌ 400 قه‌ڕوێڵه‌یه‌کی سلێمانی ئه‌که‌ین. ئێمه‌ ماوه‌ی 15 ڕۆژ له‌ ده‌رچوونی ئه‌م یاداشته‌وه‌ ئه‌ده‌ینه‌ ده‌زگا په‌یوه‌ندیداره‌کان داوای ده‌سپێکردنه‌وه‌ی کاره‌کان له‌ نه‌خۆشخانه‌که‌ ئه‌که‌ین و به‌ پێچه‌وانه‌وه‌ چالاکی و فشاری مه‌ده‌نی و یاسایی ئه‌گرینه‌ به‌ر بۆ ناچارکردنی ئه‌و ده‌زگایانه‌ بۆ ته‌واوکردنی پرۆژه‌که‌ و خستنه‌ گه‌ڕی بۆ خزمه‌تکردنی هاوڵاتیان.