Það hafa verið miklar umræður í fjölmiðlum undanfarna daga út af Snorra Óskarssyni, kallaður "Snorri í Betel", en hann er grunnskólakennari við Brekkuskóla á Akureyri. Þeim sem ekki þekkja til málsins er bent á fréttahlekkina hér fyrir neðan. Við undirrituð krefumst rannsóknar á því hvort Snorri Óskarsson, líka þekktur sem Snorri í Betel, hafi í störfum sínum gerst brotlegur við siðareglur Kennarasambands Íslands, eða jafnvel lög, og sömuleiðis að hæfni hans sem grunnskólakennara sé könnuð. Sérstaklega viljum við að kannað verði hvort Snorri hafi reynt að "afhomma" börn í sinni umsjá. Snorri neitar núorðið öllum slíkum ásökunum, en við undirrituð teljum fullt tilefni til að rannsaka málið, til dæmis með viðtölum við börn og foreldra þeirra. Snorri hefur með opinberum skrifum gert landskunnuga fordóma sína gegn Samkynhneigðum, sagt samkynhneigð vera synd og að laun syndarinnar séu dauði. Skiptar skoðanir eru um hvort þessir landsfrægu fordómar gera hann óhæfan sem kennara, hliðstætt við hvort það sé rétt að landsfrægur meðlimur nýnasista eða annara fordómafélaga sé látinn vinna með börnum. Hafa kennarar minna rúm til að tjá sig opinberlega en aðrar starfsstéttir? Þetta er umdeilt mál. Undirrituð eru ekki að taka afstöðu í því umdeilda máli... en stofnendur þessa undirskriftarlista hafa hinsvegar orðið varir við að það ganga reynslusögur manna á milli um hvernig Snorri hafi gert þessar skoðanir sínar kunnugar á skólatíma og jafnvel reynt að 'afhomma' börn innan veggja skólans. Málfrelsi utan starfstíma er eitt... en það er hins vegar er það annar handleggur ef Snorri hefur dreift fordómum sínum innan veggja skólans, hvað þá ef hann hefur gengið svo langt að reyna að "afhomma" börn í sinni umsjá. Tilraunum til "afhommunar" í barnæsku hefur verið lýst sem "sálarmorði" af samkynhneigðu fólki sem hefur lent í slíkum hremmingum og það er dapurleg staðreynd að slík misnotkun gerist á hverjum degi í sumum löndum. Undirritaðir vilja *ekki* að slíkt líðist á Íslandi, og *sérstaklega* ekki sem þrýstingur sem barn verður fyrir frá kennara. Ef Snorri er fundinn sekur um tilraunir til "afhommunar", þá teljum við undirrituð best ef hann fengi aldrei að starfa sem kennari aftur. Snorri hefur sjálfur gefið í skyn að hann myndi reyna að "af-homma" samkynhneigða nemendur sem gæfu sig fram í framtíðinni (sjá fréttaflutning Stöðvar 2 hér fyrir neðan) og er því ástæða til að gruna að sögur þessar séu trúanlegar og að þær komi til með að endurtaka sig svo lengi sem honum sé treyst fyrir börnum. Í framhaldi umfjöllun um skrif Snorra sagði hann meðal annars þetta í fréttum Stöðvar 2: „menn segja að [samkynhneigð] sé allt í lagi og það séu bara mannréttindi að fá að vera svona. Ef ég væri nú bankaræningi að eðlifari, þá væri búið að setja mig inn fyrir langa löngu“. Það verður að teljast vafasamt, að einstaklingur sem mælir gegn því að ákveðinn samfélagshópur fái að njóta sömu mannréttinda og aðrir, sé hæfur til starfa sem grunnskólakennari. Og ef ásakanir eru sannar um sambærilegan málflutning inni á skólastofu eða undir fjögur augu inná skrifstofunni, þá hlýtur það að teljast alvarlegt.