Reykjavíkurborg skartar í dag tveimur ísskautasvellum, a.m.k. einu hjólabrettahúsi (og opnum hjólabrettavelli í Laugardal), ásamt mörgum aðstöðum til iðkunar hvers kyns íþrótta og tómstunda.

Eitt sem vantar þó alfarið í Reykjavík er hjóla/línuskautahöll (eða svæði).

Margir Íslendingar hafa gaman af að hjóla/línuskauta yfir sumartímann, enda er sú iðkun góð alhliða þjálfun, og aðgengileg fyrir flesta aldurshópa. Í Reykjavíkurborg má finna marga hjólastíga sem gaman er að skauta á yfir sumartímann, en á haustin/veturna er hreinlega ekki hægt að stunda tómstundina vegna veðurfars, myrkurs, og skorts á aðstöðu. Gangstéttir í Reykjavík eru ekki ákjósanlegur flötur til að skauta á, þar sem þær eru oft ójafnar eða óhreinar (og geta þ.a.l. eyðilagt skautana eða valdið slysi), og eiga ofan á það að vera aðallega fyrir gangandi vegfarendur.

Þónokkrar íþróttagreinar tengjast hjóla/línuskautum, og má þá t.d. nefna:

Flestar þessara greina hafa ekki náð almennilegri fótfestu á Íslandi, og teljum við það að hluta til vera vegna skorts á aðstöðu. Ef salur eða höll væri til staðar, væri auðveldara að stofna íþróttafélög/klúbba og koma sportinu af stað.

Fyrir utan íþróttaiðkun, þá er hreinlega líka bara gaman að renna sér á hjóla/línuskautum við góða tónlist. Allir geta hjólaskautað – ungir sem aldnir geta skemmt sér á skautunum. Hjólaskautahöll myndi einnig hafa ákveðið forvarnargildi, þar sem hér væri boðið upp á áfengis-og-vímuefnalausa skemmtun, og ekkert aldurstakmark. Hægt væri að bjóða skólahópum á öllum stigum í heimsókn að læra á skautana, og hafa jafningjafræðslu tengda þeim viðburðum. Að sjálfsögðu myndi höllin fara eftir öllum reglum Reykjavíkurborgar varðandi reykleysi og almenna umgengni.

Þar að auki væri hægt að leigja salinn og leiðbeinendur út til hópa, t.d. vinnustaðahópa, gæsa/steggjateiti, saumaklúbba, eða annara hópa sem hefðu áhuga á hjólaskautum.

Startkostnaður við svona aðstöðu væri í lægri kantinum – eina sem í raun vantar er ágætlega stórt ferhyrnt svæði, hiti/rafmagn, snyrtingar og rennandi vatn. Viðhaldskostnaður myndi vera lítill, þar sem eina sem þarf til að halda gólfinu við er að þrífa það reglulega og bóna (annað en t.d. ísskautasvell sem krefst mikils viðhalds).

Hægt væri að fjárfesta í lager af notuðum (eða nýjum) skautum til útleigu í salnum á heildsölukostnaði.

Við skorum á Reykjavíkurborg að opna hjólaskautahöll í borginni!